കരിയറെഴുത്തിന്റെ കലയും ശാസ്ത്രവും

Mujeeb Kaindar

29 October 2026

കരിയറെഴുത്തിന്റെ കലയും ശാസ്ത്രവും

ഒരു തെറ്റായ വിവരം മതി, ഒരു കുട്ടിയുടെ അവസരം നഷ്ടപ്പെടാൻ!

അറിവുകളുടെ കുത്തൊഴുക്കിൽ കൃത്യതയോടെ എഴുതാനും ഉത്തരവാദിത്വത്തോടെ വഴികാട്ടാനും എന്തൊക്കെ ശ്രദ്ധിക്കണം?

കരിയർ എഴുത്തുകാർക്കും ഗൈഡുകൾക്കും അധ്യാപകർക്കും വായിച്ചറിയാനും സ്വയം വിലയിരുത്താനുമൊരു വായന.

കരിയറെഴുത്തിന്റെ കലയും ശാസ്ത്രവും.pdf

Article By: Mujeebulla K.M
CIGI Career Team

Comments (0)

Write a Comment

Mujeeb Kaindar
2026-10-29

കരിയർ കൗൺസലിങ് പാഠങ്ങൾ

കോഴ്‌സുകളുടെ പട്ടിക പറഞ്ഞുകൊടുത്ത്, കുറച്ച് ഉപദേശവും നൽകി മടങ്ങുന്നതിൽ കരിയർ ഗൈഡൻസ് അവസാനിക്കുന്നുണ്ടോ?

മുന്നിലിരിക്കുന്ന മനുഷ്യനെ അറിയാനും വികാരങ്ങൾ കേൾക്കാനും ശരിയായ ചോദ്യങ്ങൾ ചോദിക്കാനും ന്യൂജെൻ മക്കൾക്കൊപ്പം നടക്കാനും സഹായിക്കുന്ന വായന.

കൗൺസലിങ് എത്തിക്സ്, വളർത്തേണ്ട നൈപുണികൾ, AI ടൂളുകളുടെ ഉത്തരവാദിത്വമുള്ള ഉപയോഗം, പ്രഥമശുശ്രൂഷയുടെ പ്രസക്തി എന്നിവ ഉൾക്കൊള്ളുന്ന ഇ-പുസ്തകം.

കരിയർ ഗൈഡുമാർക്കും കൗൺസലർമാർക്കും ഈ മേഖലയിൽ പഠിക്കുന്നവർക്കും അധ്യാപകർക്കുമായി.

“എന്റെ അറിവ് ഇനിയും വിശാലമാകണം; എന്റെ കഴിവുകൾ ഇനിയും വളരണം” എന്ന ചിന്ത ഉണർത്തുന്ന കരിയർ വായന.

ഉപദേശത്തിനപ്പുറം.pdf

Article By: Mujeebulla K.M
CIGI Career Team

View Details View Details

Mujeeb Kaindar
2026-10-29

പച്ചയും ചുവപ്പും കൊടികൾക്കപ്പുറമുള്ളൊരു കരിയർ: ട്രെയിൻ മാനേജറായി ജീവിതം ട്രാക്കിലാക്കാം

റെയിൽവേ സ്റ്റേഷനിൽ നിൽക്കുമ്പോൾ ശ്രദ്ധിച്ചിട്ടുണ്ടോ? മുന്നിൽ എൻജിൻ. പിന്നിലേക്ക് നീണ്ടുകിടക്കുന്ന ബോഗികൾ. പ്ലാറ്റ്‌ഫോമിൽ യാത്രയയപ്പിന്റെ തിരക്ക്. വിസിൽ മുഴങ്ങുന്നു. സിഗ്നൽ തെളിയുന്നു. പതുക്കെ ട്രെയിൻ നീങ്ങിത്തുടങ്ങുന്നു.

നമ്മുടെ കണ്ണുകൾ പലപ്പോഴും എൻജിനിലേക്കാണ് പോകുന്നത്. ആ വലിയ വണ്ടിയെ മുന്നോട്ടു നയിക്കുന്ന ലോക്കോ പൈലറ്റിനെക്കുറിച്ച് കൗതുകത്തോടെ സംസാരിക്കും. എന്നാൽ ട്രെയിനിന്റെ മറ്റേയറ്റത്തും ആ യാത്രയുടെ സുരക്ഷയിൽ നിർണായക പങ്കുവഹിക്കുന്ന ഒരാളുണ്ട്.

പഴയ പരിചയത്തിൽ നമ്മൾ അദ്ദേഹത്തെ ‘ഗാർഡ്’ എന്നു വിളിക്കും. ഇന്നത്തെ ഔദ്യോഗിക പേര് ട്രെയിൻ മാനേജർ.

ആ പേര് കേൾക്കുമ്പോൾത്തന്നെ ജോലിയുടെ ഉത്തരവാദിത്വത്തെക്കുറിച്ച് ഒരു ധാരണ കിട്ടും. പച്ചക്കൊടി വീശുന്ന ഏതാനും നിമിഷങ്ങൾക്കപ്പുറം, ശ്രദ്ധയും സമയബോധവും ഏകോപനവും ആവശ്യപ്പെടുന്ന ഒരു തൊഴിൽലോകമുണ്ട് അവിടെ.

ബിരുദം കഴിഞ്ഞ് ഒരു നല്ല തൊഴിൽ അന്വേഷിക്കുന്ന ചെറുപ്പക്കാർ പരിചയപ്പെട്ടിരിക്കേണ്ട കരിയറുകളിൽ ഒന്നാണിത്.

യാത്ര ഇഷ്ടമാണോ? ക്ഷമയോടെ കാര്യങ്ങൾ നിരീക്ഷിക്കാൻ കഴിയുമോ? മറ്റുള്ളവരുമായി വ്യക്തമായി ആശയവിനിമയം നടത്താൻ സാധിക്കുമോ? ഉത്തരവാദിത്വം ഏൽക്കുമ്പോൾ അതിനെ ഗൗരവത്തോടെ കാണുന്ന സ്വഭാവമുണ്ടോ?

എങ്കിൽ ഈ കരിയറിനെക്കുറിച്ച് കുറച്ചുകൂടി അടുത്തറിയാം.

ഒരു രാജ്യത്തിന്റെ യാത്രയിൽ നമ്മുടെ ജോലിക്കും ഇടമുണ്ടാവുമ്പോൾ:

റെയിൽവേ എന്നു കേൾക്കുമ്പോൾ പലരുടെയും മനസ്സിൽ വരുന്നത് യാത്രക്കാരും റിസർവേഷനും അവധിക്കാല യാത്രകളുമാണ്. അതിനൊപ്പം മറ്റൊരു വലിയ ഇന്ത്യയും പാളങ്ങളിലൂടെ സഞ്ചരിക്കുന്നുണ്ട്.

ഫാക്ടറികളിലേക്കുള്ള അസംസ്‌കൃത വസ്തുക്കൾ, നിർമാണപ്രവർത്തനങ്ങൾക്കുള്ള സാമഗ്രികൾ, വിവിധ പ്രദേശങ്ങളിലേക്കുള്ള ഭക്ഷ്യധാന്യങ്ങൾ, വ്യവസായങ്ങൾക്ക് ആവശ്യമായ ചരക്കുകൾ—രാജ്യത്തിന്റെ നിത്യജീവിതത്തെ ചലിപ്പിക്കുന്ന അനേകം സാധനങ്ങൾ.

ഒരു ചരക്കുവണ്ടി ലക്ഷ്യസ്ഥാനത്തെത്തുമ്പോൾ അതിന്റെ പ്രയോജനം ഒരു സ്ഥാപനത്തിൽ ഒതുങ്ങുന്നില്ല. ഉൽപ്പാദനവും വ്യാപാരവും മനുഷ്യരുടെ ഉപജീവനവുമായി അതിന് ബന്ധമുണ്ട്.

ആ സംവിധാനത്തിന്റെ പ്രവർത്തനത്തിൽ പങ്കാളിയാകുന്ന ഉദ്യോഗസ്ഥനാണ് ഗൂഡ്സ് ട്രെയിൻ മാനേജർ.

അതുകൊണ്ട് ഈ ജോലി തിരഞ്ഞെടുക്കുന്ന ഒരാൾക്ക് ശമ്പളത്തിനൊപ്പം ലഭിക്കുന്ന മറ്റൊരു അനുഭവവുമുണ്ട്: വലിയൊരു പൊതുസംവിധാനത്തിൽ സ്വന്തം ഉത്തരവാദിത്വം നിർവഹിക്കുന്നതിന്റെ സംതൃപ്തി.

യാത്രയുണ്ട്; ഒപ്പം ജാഗ്രതയും വേണം:

“ട്രെയിനിൽ സഞ്ചരിച്ചുകൊണ്ടിരുന്നാൽ ശമ്പളം കിട്ടുമല്ലോ!”

ജോലിയെക്കുറിച്ച് ആദ്യം കേൾക്കുമ്പോൾ ചിലർ തമാശയായി ഇങ്ങനെ പറഞ്ഞേക്കാം. പക്ഷേ ആ യാത്രയ്ക്ക് പിന്നിൽ കൃത്യമായ ചുമതലകളുണ്ട്.

ട്രെയിൻ പ്രവർത്തനവുമായി ബന്ധപ്പെട്ട പരിശോധനകളും രേഖകളും, മറ്റ് റെയിൽവേ ജീവനക്കാരുമായുള്ള ഏകോപനവും, യാത്രയ്ക്കിടയിലെ നിരീക്ഷണവും, അസാധാരണ സാഹചര്യമുണ്ടായാൽ ചട്ടപ്രകാരം സ്വീകരിക്കേണ്ട നടപടികളും ഈ തൊഴിൽലോകത്തിന്റെ ഭാഗമാണ്. ചരക്കുവണ്ടികളുമായി ബന്ധപ്പെട്ട രേഖപ്പെടുത്തലിലും കൈമാറ്റനടപടികളിലും ഗാർഡിന്റെ ചുമതലകൾ റെയിൽവേ പരിശീലനരേഖകൾ വിശദീകരിക്കുന്നുണ്ട്.

ലോക്കോ പൈലറ്റ്, സ്റ്റേഷൻ ജീവനക്കാർ, കൺട്രോൾ സംവിധാനം തുടങ്ങിയവരോടൊപ്പം പ്രവർത്തിക്കുന്ന ഒരു സംഘാംഗമായാണ് ട്രെയിൻ മാനേജറെ മനസ്സിലാക്കേണ്ടത്. ഓരോരുത്തരും സ്വന്തം ഉത്തരവാദിത്വം കൃത്യമായി നിർവഹിക്കുമ്പോഴാണ് യാത്ര സുരക്ഷിതമായി മുന്നോട്ടുപോകുന്നത്.

ഇവിടെ നല്ലൊരു വ്യക്തിത്വഗുണം വലിയ തൊഴിൽനൈപുണ്യമായി മാറുന്നു..... ശ്രദ്ധിച്ചു പ്രവർത്തിക്കുന്ന ശീലം.

ഒരു വിവരം കേട്ടാൽ ശരിയായി മനസ്സിലാക്കുക. നിർദേശം വ്യക്തമായി കൈമാറുക. സംശയമുണ്ടെങ്കിൽ ഉറപ്പുവരുത്തുക. ചെയ്യേണ്ട കാര്യം സമയത്ത് ചെയ്യുക. ചെറിയൊരു നടപടിയാണെങ്കിലും അലക്ഷ്യമായി കാണാതിരിക്കുക.

ഇതൊക്കെ ഏതൊരു ജോലിയിലും ഗുണകരമാണ്. ട്രെയിൻ പ്രവർത്തനവുമായി ബന്ധപ്പെട്ട ജോലിയിൽ അതിന്റെ പ്രസക്തി കൂടുതൽ വലുതാണ്.

ഈ ജീവിതക്രമം നിങ്ങൾക്ക് ചേരുമോ?:

ഒരു കരിയർ തിരഞ്ഞെടുക്കുമ്പോൾ “എനിക്ക് ഈ ജോലി കിട്ടുമോ?” എന്നതിനൊപ്പം “ഈ ജോലിയുടെ ജീവിതക്രമം എനിക്ക് ചേരുമോ?” എന്നും ആലോചിക്കണം.

ട്രെയിൻ സർവീസിന്റെ ആവശ്യങ്ങൾക്കനുസരിച്ചാണ് ജോലി. അതിനാൽ സ്ഥിരമായ ഓഫീസ് സമയത്തിൽനിന്ന് വ്യത്യസ്തമായ ഡ്യൂട്ടികളും രാത്രിജോലിയും വീടിന് പുറത്തുള്ള വിശ്രമവേളകളും ജീവിതത്തിന്റെ ഭാഗമായേക്കാം. കുടുംബപരിപാടികൾക്കും വ്യക്തിപരമായ കാര്യങ്ങൾക്കും ഡ്യൂട്ടിക്കനുസരിച്ച് ക്രമീകരണം വേണ്ടിവരാം.

യാത്ര ഇഷ്ടപ്പെടുന്ന ഒരാൾക്കും ജോലി സംബന്ധമായ യാത്രയോട് പൊരുത്തപ്പെടാൻ പ്രത്യേകം മനസ്സൊരുക്കം ആവശ്യമാണ്. അവധിക്കാല യാത്രയുടെ മനോഭാവവും ഉത്തരവാദിത്വത്തോടെയുള്ള ഡ്യൂട്ടി യാത്രയുടെ മനോഭാവവും വ്യത്യസ്തമാണ്.

അതേസമയം, മാറുന്ന ജോലിസാഹചര്യങ്ങൾ ഇഷ്ടപ്പെടുന്നവർക്കും റെയിൽവേ പ്രവർത്തനങ്ങളിൽ കൗതുകമുള്ളവർക്കും സംഘമായി പ്രവർത്തിക്കാൻ താൽപ്പര്യമുള്ളവർക്കും ഈ തൊഴിൽ ആകർഷകമായേക്കാം.

കരിയർ ഗൈഡൻസ് നൽകുന്ന അധ്യാപകരും രക്ഷിതാക്കളും ഇവിടെ ഒരു കാര്യം ശ്രദ്ധിക്കണം. കുട്ടിയോട് ശമ്പളത്തെക്കുറിച്ച് മാത്രം സംസാരിക്കരുത്. അവന്റെ സ്വഭാവം, ആരോഗ്യയോഗ്യത, ജീവിതക്രമവുമായി പൊരുത്തപ്പെടാനുള്ള സന്നദ്ധത, ഉത്തരവാദിത്വബോധം എന്നിവയെക്കുറിച്ചും സംസാരിക്കണം.

ബിരുദധാരികൾക്ക് മുന്നിലുള്ള അവസരം:

2026-ലെ റെയിൽവേ റിക്രൂട്ട്മെന്റ് ബോർഡിന്റെ CEN 06/2026 വിജ്ഞാപനത്തിൽ ഗുഡ്സ് ട്രെയിൻ മാനേജർ തസ്തികയിൽ 2,750 ഒഴിവുകളാണ് രേഖപ്പെടുത്തിയിരിക്കുന്നത്. തിരുവനന്തപുരം ആർആർബിയുടെ കീഴിൽ ഈ തസ്തികയിൽ 21 ഒഴിവുകളുണ്ട്. ഒഴിവുകളുടെ എണ്ണത്തിൽ റെയിൽവേയുടെ ആവശ്യങ്ങൾക്കനുസരിച്ച് മാറ്റമുണ്ടാകാം.

അംഗീകൃത സർവകലാശാലയിലെ ബിരുദമാണ് അടിസ്ഥാന വിദ്യാഭ്യാസയോഗ്യത. അതുകൊണ്ട് വിവിധ വിഷയങ്ങളിൽ ബിരുദം നേടിയവർക്ക് പരിഗണിക്കാവുന്ന അവസരമാണിത്.

എന്നാൽ “ഡിഗ്രിയുണ്ടല്ലോ, അപേക്ഷിച്ചുകളയാം” എന്ന ധൃതിക്കിടെ യോഗ്യതയുടെ മറ്റു ഭാഗങ്ങൾ വിട്ടുപോകരുത്. പ്രായം, സംവരണത്തിനാവശ്യമായ രേഖകൾ, മെഡിക്കൽ മാനദണ്ഡങ്ങൾ, അപേക്ഷയിൽ നൽകുന്ന മുൻഗണനകൾ—എല്ലാം ചേർന്നാണ് അപേക്ഷ പൂർണമാകുന്നത്.

പ്രായപരിധി, വിഭാഗാനുസൃത ഇളവുകൾ, പ്രത്യേക സാഹചര്യങ്ങളിലുള്ള അപേക്ഷകരുടെ അർഹത എന്നിവ സ്വന്തം രേഖകളുമായി ഒത്തുനോക്കി ഉറപ്പുവരുത്തണം. മറ്റൊരാൾക്ക് ബാധകമായ ഇളവ് നമുക്കും ബാധകമാണെന്ന് കരുതുന്നത് ഒഴിവാക്കണം.

പരീക്ഷയ്ക്ക് മുമ്പേ മനസ്സിലാക്കേണ്ട മെഡിക്കൽ യോഗ്യത:

ഈ കരിയറിനെ പരിചയപ്പെടുത്തുമ്പോൾ വിട്ടുപോകാൻ പാടില്ലാത്ത കാര്യമാണ് മെഡിക്കൽ യോഗ്യത.

ഗൂഡ്സ് ട്രെയിൻ മാനേജർ തസ്തികയ്ക്ക് A2 മെഡിക്കൽ നിലവാരമാണ് നിർദേശിച്ചിരിക്കുന്നത്. കാഴ്ചശക്തി, വർണങ്ങൾ തിരിച്ചറിയാനുള്ള കഴിവ്, രാത്രിക്കാഴ്ച തുടങ്ങിയവയ്ക്ക് പ്രത്യേക മാനദണ്ഡങ്ങളുണ്ട്. കണ്ണടയില്ലാതെയുള്ള ദൂരക്കാഴ്ചയ്ക്കും നിശ്ചിത നിലവാരം ആവശ്യമാണ്. കാഴ്ചയിലെ refractive error പരിഹരിക്കാൻ LASIK പോലുള്ള ശസ്ത്രക്രിയ നടത്തിയവരെക്കുറിച്ചും വിജ്ഞാപനത്തിൽ പ്രത്യേക വ്യവസ്ഥയുണ്ട്.

അതുകൊണ്ട് പരീക്ഷാപരിശീലനത്തിനായി സമയവും പണവും ചെലവഴിക്കുന്നതിന് മുമ്പ് ഈ ഭാഗം വായിച്ചുമനസ്സിലാക്കുന്നത് നല്ലതാണ്. സംശയമുള്ളവർ വിജ്ഞാപനത്തിലെ കൃത്യമായ മാനദണ്ഡം ചൂണ്ടിക്കാട്ടി യോഗ്യമായ വൈദ്യോപദേശം തേടാം. അന്തിമ മെഡിക്കൽ തീരുമാനം റെയിൽവേയുടെ പരിശോധനയിലായിരിക്കും.

മറ്റു റെയിൽവേ തസ്തികകളിൽ ഭിന്നശേഷിക്കാർക്ക് ലഭിക്കുന്ന സംവരണമോ പ്രായഇളവോ ഈ തസ്തികയിലും അതേപടി ബാധകമാണെന്ന് കരുതരുത്. അപേക്ഷിക്കുന്ന തസ്തികയുടെ യോഗ്യത പ്രത്യേകം പരിശോധിക്കണം.

കരിയർ ആസൂത്രണത്തിൽ ഇത്തരം പരിശോധനകൾ വളരെ പ്രായോഗികമായ ഒരു ശീലമാണ്. സ്വന്തം യോഗ്യതയും തസ്തികയുടെ ആവശ്യങ്ങളും തുടക്കത്തിലേ മനസ്സിലാക്കിയാൽ തയ്യാറെടുപ്പിന് വ്യക്തത ലഭിക്കും.

പരീക്ഷ ജയിക്കാൻ പഠനത്തിനും ഒരു ട്രാക്ക് വേണം:

തിരഞ്ഞെടുപ്പിന്റെ പ്രധാന ഘട്ടങ്ങൾ രണ്ട് കംപ്യൂട്ടർ അധിഷ്ഠിത പരീക്ഷകളാണ്. തുടർന്ന് രേഖാപരിശോധനയും മെഡിക്കൽ പരിശോധനയും വരും.

ഒന്നാം ഘട്ടത്തിൽ 90 മിനിറ്റിൽ 100 ചോദ്യങ്ങൾ. ജനറൽ അവേർനസിന് 40, മാത്തമാറ്റിക്സിന് 30, ജനറൽ ഇന്റലിജൻസ് ആൻഡ് റീസണിങ്ങിന് 30 എന്നതാണ് സൂചിപ്പിച്ചിരിക്കുന്ന വിഭജനം.

രണ്ടാം ഘട്ടത്തിൽ 90 മിനിറ്റിൽ 120 ചോദ്യങ്ങളാണ്. ജനറൽ അവേർനസ് 50, മാത്തമാറ്റിക്സ് 35, റീസണിങ് 35. രണ്ടു ഘട്ടങ്ങളിലും തെറ്റുത്തരത്തിന് മൂന്നിലൊന്ന് മാർക്ക് കുറയും.

ഈ ഘടന നോക്കിയാൽ തയ്യാറെടുപ്പിന്റെ സ്വഭാവം മനസ്സിലാകും. അറിവിനൊപ്പം വേഗവും കൃത്യതയും വേണം.

“ഈ ചോദ്യം എനിക്ക് അറിയാം” എന്നതിൽനിന്ന് “ഈ ചോദ്യം കുറഞ്ഞ സമയത്തിനുള്ളിൽ ശരിയായി ചെയ്യാം” എന്ന നിലയിലേക്ക് എത്തണം. അതിന് പരിശീലനമാണ് വഴി.

മാത്തമാറ്റിക്സിൽ അടിസ്ഥാന ആശയങ്ങൾ ഉറപ്പിക്കുക. റീസണിങ്ങിൽ വ്യത്യസ്ത ചോദ്യരീതികൾ പരിചയപ്പെടുക. പൊതുവിജ്ഞാനവും സമകാലിക വിഷയങ്ങളും ക്രമമായി പഠിക്കുക. മുൻവർഷ ചോദ്യങ്ങളും സമയപരിധിയുള്ള മോക്ക് ടെസ്റ്റുകളും ഉപയോഗിക്കുക.

ഒരു മോക്ക് ടെസ്റ്റ് എഴുതിയിട്ട് മാർക്ക് മാത്രം നോക്കി അടച്ചുവെക്കരുത്. തെറ്റിയ ചോദ്യങ്ങളിലാണ് അടുത്ത ദിവസത്തെ പഠനത്തിനുള്ള സൂചനകൾ കിടക്കുന്നത്.

ആശയം അറിയാതെയാണോ തെറ്റിയത്? കണക്കിൽ പിഴച്ചോ? ചോദ്യം ധൃതിയിൽ വായിച്ചോ? അറിയാത്ത ചോദ്യത്തിൽ ഊഹിച്ചോ? സമയക്കുറവുണ്ടായോ?

ഈ ചോദ്യങ്ങൾക്ക് സത്യസന്ധമായി ഉത്തരം കണ്ടെത്തുന്നയാളുടെ പഠനം മെച്ചപ്പെടും.

യോഗ്യതാമാർക്ക് നേടുന്നതും അടുത്ത ഘട്ടത്തിലേക്ക് തിരഞ്ഞെടുക്കപ്പെടാനുള്ള കട്ട് ഓഫ് കടക്കുന്നതും വ്യത്യസ്ത കാര്യങ്ങളാണെന്നും ഓർക്കണം. മത്സരപരീക്ഷയിൽ തയ്യാറെടുപ്പിന്റെ ലക്ഷ്യം സ്വന്തം പ്രകടനം പരമാവധി മെച്ചപ്പെടുത്തുക എന്നതായിരിക്കണം.

ശമ്പളം അറിയാം; പ്രതീക്ഷയും കൃത്യമാക്കാം:

ഈ തസ്തികയുടെ തുടക്ക അടിസ്ഥാനശമ്പളം ഏഴാം ശമ്പളക്കമ്മിഷന്റെ ലെവൽ അഞ്ചിൽ ₹29,200 ആണ്.

അടിസ്ഥാനശമ്പളത്തിനൊപ്പം ചട്ടപ്രകാരമുള്ള അലവൻസുകളും ആനുകൂല്യങ്ങളും വരും. റണ്ണിങ് ഡ്യൂട്ടിയുമായി ബന്ധപ്പെട്ട ആനുകൂല്യങ്ങളും ഈ തൊഴിൽ തിരഞ്ഞെടുക്കുന്നവർ അന്വേഷിച്ചറിയേണ്ടതാണ്.

എന്നാൽ “തുടക്കത്തിൽ എല്ലാവർക്കും കൃത്യമായി ഇത്ര രൂപ കൈയിൽ കിട്ടും” എന്ന് ഒരൊറ്റ തുക ഉറപ്പിച്ചുപറയുന്നത് ശരിയാവില്ല. പോസ്റ്റിങ്, ബാധകമായ അലവൻസുകൾ, ഡ്യൂട്ടി, പിടിത്തങ്ങൾ തുടങ്ങിയവയെ ആശ്രയിച്ച് കൈയിൽ ലഭിക്കുന്ന തുക വ്യത്യാസപ്പെടും.

സാമ്പത്തിക സ്ഥിരതയും തൊഴിൽസുരക്ഷയും പ്രധാനമാണ്. അതിനൊപ്പം ആ വരുമാനത്തിനായി നമ്മൾ ഏറ്റെടുക്കുന്ന ഉത്തരവാദിത്വവും ജീവിതക്രമവും മനസ്സിലാക്കുമ്പോഴാണ് കരിയർ തിരഞ്ഞെടുപ്പ് പക്വമാകുന്നത്.

സർവീസിൽ പ്രവേശിച്ചതിനുശേഷമുള്ള വളർച്ചാസാധ്യതകളും അന്വേഷിക്കാം. പാസഞ്ചർ സർവീസുകളിലേക്കുള്ള മുന്നേറ്റമോ മറ്റ് വകുപ്പുതല അവസരങ്ങളോ അന്നത്തെ ചട്ടങ്ങൾക്കും യോഗ്യതയ്ക്കും തിരഞ്ഞെടുപ്പ് നടപടികൾക്കും വിധേയമായിരിക്കും. ആദ്യ നിയമനത്തെക്കുറിച്ച് മനസ്സിലാക്കുന്നതിനൊപ്പം തുടർവളർച്ചയുടെ വഴികളും അറിയുന്നത് നല്ലതാണ്.

അപേക്ഷിക്കുന്ന കാര്യത്തിൽ അവസാനദിവസത്തെ സാഹസികത വേണ്ട:

ഔദ്യോഗിക അപേക്ഷാപോർട്ടൽ പ്രകാരം അപേക്ഷ സമർപ്പിക്കാനുള്ള അവസാന തീയതി 2026 നവംബർ 6, രാത്രി 11.59 ആണ്. അപേക്ഷ നൽകേണ്ടത് www.rrbapply.gov.in വഴിയാണ്.

അവസാന ദിവസം വരെ കാത്തിരിക്കേണ്ട കാര്യമില്ല. രേഖകളിലെ പേരും ജനനത്തീയതിയും പരിശോധിക്കുക. ബിരുദയോഗ്യതയുടെ വിവരങ്ങൾ ഉറപ്പാക്കുക. സംവരണം ആവശ്യപ്പെടുന്നവർ നിർദിഷ്ട മാതൃകയിലുള്ള രേഖകൾ തയ്യാറാക്കുക. സ്വന്തം മൊബൈൽ നമ്പറും ഇമെയിലും സജീവമായി സൂക്ഷിക്കുക.

അപേക്ഷാഫീസ്, ഫീസ് അടയ്ക്കേണ്ട അവസാന തീയതി, തിരുത്തലിന് അനുവദിച്ച സമയം, ഫീസ് തിരിച്ചുനൽകുന്നതിനുള്ള നിബന്ധനകൾ എന്നിവ വിജ്ഞാപനത്തിൽ വായിച്ചശേഷം അപേക്ഷ പൂർത്തിയാക്കണം.

ആർആർബി തിരഞ്ഞെടുക്കുന്നതിലും ശ്രദ്ധ വേണം. കൂടുതൽ ഒഴിവുകളുള്ള ബോർഡ് എന്ന ഒറ്റ കാരണത്താൽ തീരുമാനമെടുക്കാതെ, അറിയിച്ചിരിക്കുന്ന റെയിൽവേയും തസ്തികകളും സ്വന്തം മുൻഗണനകളും നോക്കണം.

അക്ഷയകേന്ദ്രത്തിന്റെയോ മറ്റൊരാളുടെയോ സഹായം തേടുന്നതിൽ പ്രശ്നമില്ല. എന്നാലും അപേക്ഷയിലെ വിവരങ്ങൾ പരിശോധിക്കേണ്ടത് ഉദ്യോഗാർഥിയാണ്. സമർപ്പിച്ച അപേക്ഷയുടെ പകർപ്പും ഫീസ് രസീതും സൂക്ഷിക്കണം. തുടർന്നുള്ള അറിയിപ്പുകൾ സ്വയം പരിശോധിക്കുന്ന ശീലവും വേണം.

സ്വന്തം കരിയറിന്റെ ആദ്യ ഉത്തരവാദിത്വം അവിടെനിന്നാണ് തുടങ്ങുന്നത്.

ട്രെയിൻ മാനേജർ എന്ന കരിയറിന്റെ ഭംഗി അതിന്റെ പേരിൽ മാത്രം ഒതുങ്ങുന്നില്ല. ശ്രദ്ധയോടെ ജോലി ചെയ്യുന്ന ഒരാൾക്ക് വലിയൊരു സംവിധാനത്തിന്റെ വിശ്വസ്ത ഭാഗമാകാൻ കഴിയുന്നു എന്നതിലാണ് അതിന്റെ മൂല്യം.

ഒരിക്കൽ പ്ലാറ്റ്‌ഫോമിൽനിന്ന് കൗതുകത്തോടെ നോക്കിനിന്ന ട്രെയിൻ നിങ്ങളുടെ ജോലിസ്ഥലമായി മാറിയേക്കാം. അന്ന് ആ പച്ചക്കൊടിക്ക് മറ്റൊരു അർഥമുണ്ടാകും.

ഒരു ട്രെയിൻ മുന്നോട്ടുപോകാനുള്ള അനുമതിക്കൊപ്പം, ഉത്തരവാദിത്വത്തോടെ നിങ്ങൾ പടുത്തുയർത്തിയ ജീവിതത്തിന്റെ അടയാളവും.

Article By: Mujeebulla K.M
CIGI Career Team

View Details View Details

Mujeeb Kaindar
2026-10-29

തെറ്റുകൾക്ക് നൂറുമേനി, പരിശ്രമങ്ങൾക്കോ പുല്ലുവില.......... എന്തുകൊണ്ടാണ് നമ്മൾ ഇങ്ങനെയായത്?

നമ്മളൊക്കെ ജീവിതത്തിൽ എപ്പോഴെങ്കിലും ഒരിക്കലെങ്കിലും ഒരു നെടുവീർപ്പോടെ പറഞ്ഞിട്ടുള്ള ഒരു ഡയലോഗ് ആയിരിക്കും ഇത്: "നൂറ് കാര്യങ്ങൾ നന്നായി ചെയ്താലും ആരും കാണില്ല, പക്ഷെ ഒരൊറ്റ തെറ്റ് പറ്റിയാൽ എല്ലാവരും അതെടുത്ത് അലക്കും!" ഇംഗ്ലീഷിൽ വളരെ ലളിതമായി ഇതിനെ "Errors are noticed, efforts are ignored" എന്ന് പറയാം. കേൾക്കുമ്പോൾ വളരെ ചെറിയൊരു വാചകമാണെങ്കിലും, ഇതിനു പിന്നിൽ ഒളിഞ്ഞിരിക്കുന്നത് മനുഷ്യന്റെ വലിയൊരു മാനസികാവസ്ഥയാണ്.

എന്തുകൊണ്ടാണ് നമ്മൾ ഇങ്ങനെ ആയിപ്പോയത്? എന്തുകൊണ്ടാണ് ഒരു വ്യക്തിയുടെ കഷ്ടപ്പാടുകളേക്കാൾ കൂടുതൽ അവരുടെ വീഴ്ചകൾക്ക് നമ്മൾ മാർക്കിടുന്നത്? നമുക്കൊന്ന് ചിന്തിച്ചു നോക്കാം.

ഓഫീസിലെ ആ 'വില്ലൻ' ബോസ്സ്:

ഒരു ഐടി കമ്പനിയിലോ അല്ലെങ്കിൽ ഏതെങ്കിലും ഒരു ഓഫീസിലോ ജോലി ചെയ്യുന്ന ഒരാളുടെ കാര്യം തന്നെയെടുക്കാം. കഴിഞ്ഞ ആറുമാസമായി അയാൾ കൃത്യസമയത്ത് ജോലി തീർക്കുന്നു, ഓവർടൈം ചെയ്യുന്നു, കമ്പനിക്ക് വലിയ ലാഭം ഉണ്ടാക്കിക്കൊടുക്കുന്നു. അന്നൊന്നും ആരും അയാളെ അഭിനന്ദിക്കാൻ വന്നിട്ടുണ്ടാകില്ല. ഒരു 'ഗുഡ് മോർണിംഗ്' പോലും പലപ്പോഴും കിട്ടിയെന്ന് വരില്ല.

എന്നാൽ, പെട്ടെന്നൊരു ദിവസം ട്രാഫിക് ബ്ലോക്കിൽ പെട്ട് അയാൾ ഒരു പത്ത് മിനിറ്റ് വൈകി ഓഫീസിലെത്തുന്നു, അല്ലെങ്കിൽ ഒരു ചെറിയ കണക്കിൽ തെറ്റ് പറ്റുന്നു. അന്ന് തീർന്നു അയാളുടെ സമാധാനം! അതുവരെ ചെയ്ത നൂറ് നല്ല കാര്യങ്ങൾ ആ ഒറ്റ തെറ്റിൽ ഒലിച്ചുപോകും. "നിനക്ക് ഒട്ടും ഉത്തരവാദിത്തമില്ല" എന്ന ഒറ്റ ഡയലോഗിൽ അതുവരെയുള്ള അയാളുടെ ഉറക്കമൊഴിക്കലുകൾ മുഴുവൻ റദ്ദാക്കപ്പെടും.

വീട്ടിലെ കാര്യവും വ്യത്യസ്തമല്ല:

ഓഫീസിൽ മാത്രമല്ല, നമ്മുടെ സ്വന്തം വീടുകളിലും അവസ്ഥ ഇത് തന്നെയാണ്. അമ്മമാർ വർഷങ്ങളോളം ദിവസവും മൂന്നുനേരം നമുക്ക് ഇഷ്ടമുള്ള ഭക്ഷണം ഉണ്ടാക്കിത്തരുന്നു. അതൊക്കെ അവരുടെ 'ഡ്യൂട്ടി' ആണെന്ന മട്ടിലാണ് നമ്മൾ പലപ്പോഴും കാണുന്നത്. എന്നാൽ ഏതെങ്കിലുമൊരു ദിവസം കറിയിൽ അല്പം ഉപ്പ് കൂടിയാലോ? അന്ന് തുടങ്ങും നമ്മുടെ വക കുറ്റപ്പെടുത്തലുകൾ.

"എന്താണിതൊക്കെ? ഇത്രയും കാലമായിട്ടും ഒരു കറി വെക്കാൻ അറിയില്ലേ?" എന്നൊക്കെ നമ്മൾ വളരെ എളുപ്പത്തിൽ ചോദിക്കും. അവർ അടുക്കളയിൽ വിയർത്തൊലിച്ചു നിന്ന ആ 'Effort' നമ്മൾ കാണാതെ പോവുകയും, ഉപ്പ് കൂടിയ ആ 'Error' നമ്മൾ ആഘോഷമാക്കുകയും ചെയ്യുന്നു.

സയൻസ് പറയുന്നതെന്താണ്? (Negativity Bias):

ഇതൊക്കെ കേൾക്കുമ്പോൾ മനുഷ്യരൊക്കെ ഇത്രയും മോശക്കാരാണോ എന്ന് തോന്നാം. എന്നാൽ ഇതിനു പിന്നിൽ ചെറിയൊരു ശാസ്ത്രമുണ്ട്. സൈക്കോളജിയിൽ ഇതിനെ 'Negativity Bias' (നെഗറ്റിവിറ്റി ബയാസ്) എന്നാണ് വിളിക്കുന്നത്. അതായത്, നല്ല കാര്യങ്ങളേക്കാൾ വേഗത്തിൽ മോശം കാര്യങ്ങളെ ശ്രദ്ധിക്കാനും ഓർമ്മിച്ചുവെക്കാനും നമ്മുടെ തലച്ചോറിന് ഒരു പ്രത്യേക കഴിവുണ്ട്.

ആദിമകാലത്ത് മനുഷ്യൻ കാട്ടിൽ ജീവിച്ചിരുന്നപ്പോൾ, ചുറ്റുപാടുമുള്ള അപകടങ്ങളെ (തെറ്റുകളെ/മാറ്റങ്ങളെ) പെട്ടെന്ന് തിരിച്ചറിയുക എന്നത് ജീവൻ നിലനിർത്താൻ അത്യാവശ്യമായിരുന്നു. ആ ഒരു സ്വഭാവം പരിണമിച്ചു വന്നാണ് ഇന്നത്തെ നിലയിൽ എത്തിയത്. അതുകൊണ്ടാണ് ഒരു വെള്ള പേപ്പറിൽ വരച്ച ചെറിയൊരു കറുത്ത കുത്ത് മാത്രം നമ്മുടെ കണ്ണിൽ ആദ്യം ഉടക്കുന്നത്.

സോഷ്യൽ മീഡിയയിലെ 'ക്യാൻസൽ കൾച്ചർ':

ഇന്നത്തെ കാലത്ത് ഈ സ്വഭാവം ഏറ്റവും കൂടുതൽ കാണുന്നത് സോഷ്യൽ മീഡിയയിലാണ്. ഒരു നടനോ രാഷ്ട്രീയക്കാരനോ എത്രയൊക്കെ നല്ല കാര്യങ്ങൾ ചെയ്താലും അതൊന്നും വലിയ വാർത്തയാകില്ല. എന്നാൽ അവരുടെ ഭാഗത്തുനിന്ന് ചെറിയൊരു നാക്കുപിഴ ഉണ്ടായാൽ മതി, പിന്നെ ട്രോളുകളുടെ പൂരമാണ്. നിമിഷനേരം കൊണ്ട് അവരെ സമൂഹമാധ്യമങ്ങളിൽ വിചാരണ ചെയ്തു തീർക്കും. ഒരാളുടെ പൂർണ്ണമായ വ്യക്തിത്വത്തെ വിലയിരുത്താൻ അവരുടെ ഒരൊറ്റ തെറ്റ് മാത്രം മതി എന്നൊരു ചിന്താഗതിയിലേക്ക് നമ്മൾ മാറിയിരിക്കുന്നു.

ഇതിനൊരു മാറ്റം വേണ്ടേ?

തീർച്ചയായും വേണം. തെറ്റുകൾ ചൂണ്ടിക്കാണിക്കുന്നത് മോശം കാര്യമല്ല, അത് തിരുത്തപ്പെടേണ്ടത് തന്നെയാണ്. എന്നാൽ അതിനൊപ്പം തന്നെ ഒരാളുടെ നല്ല ശ്രമങ്ങളെ (Efforts) അംഗീകരിക്കാനും നമ്മൾ പഠിക്കണം.

അംഗീകരിക്കാൻ പിശുക്ക് കാണിക്കാതിരിക്കുക: നിങ്ങളുടെ കൂടെ ജോലി ചെയ്യുന്ന ഒരാൾ നല്ലൊരു കാര്യം ചെയ്താൽ, "നന്നായിട്ടുണ്ട്" എന്ന് പറയാൻ മടിക്കരുത്.
സ്വയം അഭിനന്ദിക്കുക: മറ്റുള്ളവർ നിങ്ങളുടെ ശ്രമങ്ങളെ അംഗീകരിക്കുന്നില്ല എന്ന് കരുതി നിരാശപ്പെടരുത്. നിങ്ങൾ ചെയ്ത കഷ്ടപ്പാടിന്റെ വില നിങ്ങൾക്ക് മാത്രമേ അറിയൂ. അതുകൊണ്ട് നിങ്ങളെത്തന്നെ അഭിനന്ദിക്കാൻ പഠിക്കുക.
തെറ്റുകളെ പാഠങ്ങളായി കാണുക: ഒരു തെറ്റ് പറ്റുമ്പോൾ ആ വ്യക്തിയെ പൂർണ്ണമായി തള്ളിക്കളയാതെ, അതൊരു അനുഭവമായി മാത്രം കാണാൻ ശ്രമിക്കുക.

ലോകം എപ്പോഴും നമ്മുടെ തെറ്റുകൾ കണ്ടുപിടിക്കാൻ ഭൂതക്കണ്ണാടിയും വെച്ചിരിപ്പുണ്ടാകും. അത് അവരുടെ പ്രശ്നമാണ്, നമ്മുടേതല്ല. നമ്മൾ ചെയ്യുന്ന കഠിനാധ്വാനങ്ങൾക്കും ശ്രമങ്ങൾക്കും നമ്മൾ തന്നെ വില കൊടുക്കുക. കാരണം, തെറ്റുകൾ തിരുത്താനുള്ളതാണ്, എന്നാൽ ആത്മാർത്ഥമായ ശ്രമങ്ങൾ ആഘോഷിക്കപ്പെടേണ്ടതുമാണ്!

Article By: Mujeebulla K.M
CIGI Career Team

View Details View Details

Blogs

കരിയറെഴുത്തിന്റെ കലയും ശാസ്ത്രവും

Comments (0)

Write a Comment