BOT അതോ BASLP?
ഇന്നത്തെ ശമ്പളമോ, നാളത്തെ കരിയർ സുരക്ഷയോ?:
ഒരു കോഴ്സ് തിരഞ്ഞെടുക്കുമ്പോൾ പലരും ആദ്യം ചോദിക്കുന്നത് "ഇപ്പോൾ ശമ്പളം എത്ര കിട്ടും?" എന്നാണ്. എന്നാൽ അഞ്ച് വർഷം കഴിഞ്ഞ് തൊഴിൽ വിപണിയുടെ സ്ഥിതി എന്തായിരിക്കും എന്ന ചോദ്യം ചോദിക്കുന്നവർ വളരെ കുറവാണ്. 2026-ൽ BOT-യും BASLP-യും തമ്മിൽ തിരഞ്ഞെടുക്കുന്ന ഒരു വിദ്യാർത്ഥി, യഥാർത്ഥത്തിൽ 2031-ലെ തൊഴിൽ വിപണിയിലേക്കാണ് പ്രവേശിക്കുന്നത്. അതുകൊണ്ടുതന്നെ ഇന്നത്തെ ശമ്പളം മാത്രമല്ല, നാളത്തെ കരിയർ സുരക്ഷയും പരിശോധിക്കേണ്ട സമയമാണിത്.
ഇന്ന് ഇന്ത്യയിലും ലോകമെമ്പാടും ഏറ്റവും ഡിമാൻഡുള്ള Allied Health Professionals-ൽ പ്രധാനപ്പെട്ട രണ്ട് വിഭാഗങ്ങളാണ് Occupational Therapists (BOT) ഉം Speech-Language Pathologists & Audiologists (BASLP) ഉം.
ഇന്ത്യയിൽ ഇന്ന് BOT പൂർത്തിയാക്കി പുറത്തിറങ്ങുന്ന ഒരാൾക്ക് ആദ്യ ശമ്പളമായി പ്രതിമാസം ₹50,000 വരെ ലഭിക്കുന്ന അവസരങ്ങൾ കാണുമ്പോൾ, BASLP കഴിഞ്ഞിറങ്ങുന്നവർക്ക് ₹35,000 മുതൽ ആരംഭിക്കുന്ന ഓഫറുകളാണ് സാധാരണയായി ലഭിക്കുന്നത്. പല Child Development Centres-കളും താമസവും ഭക്ഷണവും ഉൾപ്പെടെയുള്ള ആനുകൂല്യങ്ങളും നൽകുന്നുണ്ട്.
എന്നാൽ വിദേശരാജ്യങ്ങളിലെ സ്ഥിതി വ്യത്യസ്തമാണ്. യുകെ, അയർലൻഡ്, ഓസ്ട്രേലിയ, ന്യൂസിലൻഡ് തുടങ്ങിയ രാജ്യങ്ങളിൽ ഈ രണ്ട് പ്രൊഫഷനുകൾക്കും ഏകദേശം സമാനമായ ശമ്പളനിരക്കുകളാണ് നിലവിലുള്ളത്. ഉദാഹരണത്തിന്, യുകെയിൽ NHS-ന്റെ Band 5 ശമ്പള സ്കെയിലിലാണ് (GBP 27500) ഇരുവിഭാഗത്തിലെയും പുതിയ പ്രൊഫഷണലുകൾ ജോലിയിൽ പ്രവേശിക്കുന്നത്. യുഎഇയിൽ ആവശ്യമായ ലൈസൻസും (DHA) രണ്ട് വർഷത്തെ പ്രവൃത്തിപരിചയവുമുള്ളവർക്ക് ഏകദേശം 9,000 AED മുതൽ പ്രതിമാസ ശമ്പളം ലഭിക്കുന്നു. അനുഭവപരിചയം കൂടുന്നതിനനുസരിച്ച് ശമ്പളവും അതിവേഗം ഉയരുന്നു.
ഇന്ത്യയിൽ ഇന്ന് ഭൂരിഭാഗം അവസരങ്ങളും Child Development Centres-ലാണ്.
ഇന്ത്യയിൽ ഇപ്പോൾ BOT-ക്കാണ് കൂടുതൽ ശമ്പളം. എന്തുകൊണ്ട്?:
ഉത്തരം വളരെ ലളിതമാണ്. ഇന്ത്യയിൽ ആവശ്യത്തിന് ആനുപാതികമായി BOT പ്രൊഫഷണലുകളുടെ ലഭ്യത വർഷങ്ങളോളം കുറവായിരുന്നു. അതിനാൽ യോഗ്യരായ Occupational Therapists-നെ കണ്ടെത്താൻ സ്ഥാപനങ്ങൾ തമ്മിൽ മത്സരിക്കേണ്ട സാഹചര്യം ഉണ്ടായി.
എന്നാൽ കഴിഞ്ഞ ഏതാനും വർഷങ്ങളായി സ്ഥിതി അതിവേഗം മാറുകയാണ്.
ഒരു ഉദാഹരണം നോക്കാം. 2019 വരെ മംഗലാപുരത്ത് BOT കോഴ്സ് നടത്തിയ ഒരു സ്ഥാപനവും ഉണ്ടായിരുന്നില്ല. എന്നാൽ 2026 ആയപ്പോഴേക്കും 14 സ്ഥാപനങ്ങളിൽ BOT ആരംഭിച്ചു.
മറുവശത്ത്, 1990 മുതൽ BASLP കോഴ്സ് മംഗലാപുരത്തുണ്ടെങ്കിലും ഇന്നും 6 സ്ഥാപനങ്ങളിൽ മാത്രമാണ് അത് നടത്തുന്നത്.
ഇത് മംഗലാപുരത്തിന്റെ മാത്രം കഥയല്ല; ഇന്ത്യയുടെ മൊത്തം ചിത്രവും ഇതുതന്നെയാണ്.
2026–27 അധ്യയനവർഷത്തിൽ ഇന്ത്യയിൽ RCI അംഗീകാരത്തോടെ BASLP കോഴ്സ് നടത്തുന്ന സ്ഥാപനങ്ങൾ വെറും 99 മാത്രമാണ്.:
അതേസമയം, BOT കോഴ്സ് നടത്തുന്ന സ്ഥാപനങ്ങൾ 200-ൽ അധികമാണിന്ന്. കഴിഞ്ഞ ഏതാനും വർഷങ്ങളായി സ്വകാര്യ സർവകലാശാലകളും Deemed Universities-കളും വൻതോതിൽ BOT കോഴ്സുകൾ ആരംഭിച്ചതാണ് ഇതിന് പ്രധാന കാരണം.
എന്തുകൊണ്ടാണ് ഇത്ര വലിയ വ്യത്യാസം?:
BASLP കോഴ്സുകൾക്ക് അംഗീകാരം നൽകുന്ന Rehabilitation Council of India (RCI) സ്ഥാപനങ്ങളുടെ നിലവാരത്തിലും സീറ്റുകളുടെ എണ്ണത്തിലും വളരെ കർശനമായ നിയന്ത്രണമാണ് പാലിക്കുന്നത്.
സാധാരണയായി പുതിയ സ്ഥാപനങ്ങൾക്ക് ആദ്യം 20 സീറ്റുകൾ മാത്രമാണ് അനുവദിക്കുക. ആവശ്യമായ അധ്യാപകർ, ക്ലിനിക്കൽ സൗകര്യങ്ങൾ, അടിസ്ഥാനസൗകര്യങ്ങൾ എന്നിവ വിശദമായി പരിശോധിച്ച ശേഷമാണ് 25, 30, പരമാവധി 40 സീറ്റുകളിലേക്ക് വർധിപ്പിക്കുന്നത്. അതിൽ കൂടുതൽ അനുവദിക്കാറില്ല. മാനദണ്ഡങ്ങൾ പാലിക്കാത്ത ചില സ്ഥാപനങ്ങളുടെ അംഗീകാരം RCI റദ്ദാക്കിയിട്ടുമുണ്ട്.
അതുകൊണ്ടുതന്നെ 2026–27 അധ്യയനവർഷത്തിൽ ഇന്ത്യയിലാകെ BASLP കോഴ്സ് നടത്തുന്ന സ്ഥാപനങ്ങളുടെ എണ്ണം 99-ൽ ഒതുങ്ങുന്നു.
മറുവശത്ത്, Occupational Therapy ഇപ്പോൾ NCAHP-യുടെ പരിധിയിലാണെങ്കിലും, രാജ്യത്തുടനീളമുള്ള സ്ഥാപനങ്ങളുടെ മേൽനോട്ട സംവിധാനം പൂർണമായും ശക്തമായിട്ടില്ല. കേരളം ഒഴികെയുള്ള പല സംസ്ഥാനങ്ങളിലും പുതിയ കോളേജുകൾ ആരംഭിക്കുന്നത് താരതമ്യേന എളുപ്പമാണ്. Deemed Universities-ക്ക് State Health University-യുടെ അംഗീകാരം ആവശ്യമില്ലാത്തതിനാൽ വിദ്യാർത്ഥി പ്രവേശനത്തിലും വലിയ നിയന്ത്രണങ്ങളില്ല.
ഉദാഹരണത്തിന്, മംഗലാപുരത്തെ ചില സ്വകാര്യ സർവകലാശാലകളിൽ ഒരു ബാച്ചിൽ തന്നെ 200 വിദ്യാർത്ഥികളെ BOT കോഴ്സിലേക്ക് പ്രവേശിപ്പിക്കുന്നുണ്ട്.: ഇത്തരത്തിൽ രാജ്യത്തിന്റെ പല ഭാഗങ്ങളിലും സീറ്റുകളുടെ എണ്ണം വേഗത്തിൽ വർധിച്ചുകൊണ്ടിരിക്കുകയാണ്.
ആരോഗ്യമേഖലയിലെ തൊഴിൽവിപണി എങ്ങനെ മാറുമെന്ന് മനസ്സിലാക്കാൻ ഫിസിയോതെറാപ്പി (BPT) ഒരു ഉദാഹരണമാണ്. വർഷങ്ങൾക്ക് മുമ്പ് BPT ബിരുദധാരികൾക്ക് വലിയ ഡിമാൻഡും മികച്ച ആരംഭശമ്പളവുമായിരുന്നു. പിന്നീട് കോളേജുകളുടെയും സീറ്റുകളുടെയും എണ്ണം വർധിച്ചതോടെ പല പ്രദേശങ്ങളിലും മത്സരവും ശമ്പളനിരക്കിലെ സമ്മർദ്ദവും വർധിച്ചു. BOT-യുടെ കാര്യത്തിലും നിലവിലെ പ്രവണത തുടർന്നാൽ സമാനമായ സാഹചര്യം ഉണ്ടായേക്കാ മെന്നാണ് ചില കരിയർ വിദഗ്ധരുടെ വിലയിരുത്തൽ.
BASLP-യ്ക്ക് ചില പ്രത്യേക മുൻതൂക്കങ്ങളുമുണ്ട്:
ശമ്പളവും തൊഴിൽസാധ്യതയും മാത്രമല്ല, ചില പ്രായോഗിക കാര്യങ്ങളിലും BASLP-യ്ക്ക് ശ്രദ്ധേയമായ ചില പ്രത്യേകതകളുണ്ട്.
- നാല് വർഷം കൊണ്ട് തന്നെ ഒരു സമ്പൂർണ പ്രൊഫഷണലായി ജോലിയിൽ പ്രവേശിക്കാം.
- സ്വന്തം Speech Therapy Clinic ആരംഭിക്കാൻ വിലപിടിപ്പുള്ള ഉപകരണങ്ങളിൽ നിക്ഷേപം നടത്തേണ്ട ആവശ്യമില്ല.
- Speech therapy, Audiology എന്നീ രണ്ട് മേഖലകളിലും കരിയർ വളർത്താൻ അവസരമുണ്ട്. പ്രത്യേകിച്ച് Audiologists-ന് യുകെ, അയർലൻഡ്, ഓസ്ട്രേലിയ, ന്യൂസിലൻഡ് തുടങ്ങിയ രാജ്യങ്ങളിൽ മികച്ച ഡിമാൻഡാണ്.
- Occupational Therapy-യുമായി താരതമ്യം ചെയ്യുമ്പോൾ Speech Therapy-യിൽ ശാരീരിക അധ്വാനം പൊതുവേ കുറവാണ്.
ഇന്ത്യയിലെ ശമ്പള ട്രെൻഡ് മാറുമോ?:
ആഗോള കരിയർ ട്രെൻഡുകൾ സൂക്ഷ്മമായി നിരീക്ഷിക്കുന്ന ദുബായ് ആസ്ഥാനമായുള്ള മലയാളി കരിയർ കൺസൾട്ടന്റ് മുജീബുള്ള കെ. മുഹമ്മദ് പറയുന്നത്, നിലവിലെ പ്രവണത തുടർന്നാൽ ഇന്ത്യയിൽ ഇന്ന് BOT-ക്കുള്ള ശമ്പള മുൻതൂക്കം വരും വർഷങ്ങളിൽ BASLP-യിലേക്ക് മാറാൻ സാധ്യതയുണ്ടെന്നാണ്.
അദ്ദേഹത്തിന്റെ വിലയിരുത്തൽ ഇങ്ങനെയാണ്:
"2026-ൽ BOT-യ്ക്ക് ചേരുന്ന ഒരു വിദ്യാർത്ഥി പഠനം പൂർത്തിയാക്കി പുറത്തിറങ്ങുന്നത് 2031-ലായിരിക്കും. അതിനകം വലിയ തോതിൽ BOT ബിരുദധാരികൾ തൊഴിൽവിപണിയിലെത്തും. എന്നാൽ BASLP ഇപ്പോഴും RCI കർശനമായി നിയന്ത്രിക്കുന്ന, പരിമിത സീറ്റുകളുള്ള കോഴ്സാണ്. നിലവിലെ പ്രവണത തുടർന്നാൽ ഈ മേഖലയിൽ സാറ്റുറേഷൻ സംഭവിക്കാൻ ഇനിയും വർഷങ്ങൾ എടുക്കും. അതിനാൽ ദീർഘകാല തൊഴിൽസുരക്ഷയും ആഗോള അവസരങ്ങളും പരിഗണിക്കുമ്പോൾ BASLP കൂടുതൽ ശക്തമായ തിരഞ്ഞെടുപ്പായി മാറാൻ സാധ്യതയുണ്ട്."
ഈ വർഷം AIISH-ൽ BASLP-ക്കും ജാമിയ ഹംദർദിൽ BOT-ക്കും ഒരേസമയം പ്രവേശനം ലഭിച്ച ഒരു വിദ്യാർത്ഥി ഏത് തിരഞ്ഞെടുക്കണമെന്ന് ചോദിച്ചപ്പോൾ അദ്ദേഹം നൽകിയ മറുപടി ലളിതമായിരുന്നു.
"ഞാനായിരുന്നെങ്കിൽ AIISH-ൽ ലഭിച്ച BASLP സീറ്റ് വിട്ടുകൊടുക്കില്ല."
അറിയാമോ?:
Occupational Therapy (BOT), Physiotherapy (BPT) പ്രൊഫഷണലുകൾക്ക് മറ്റൊരു പ്രത്യേകത കൂടിയുണ്ട്. NCAHP പുറത്തിറക്കിയ ദേശീയ പാഠ്യപദ്ധതിയിൽ ഈ പ്രൊഫഷണലുകൾക്ക് "Dr." എന്ന പ്രിഫിക്സ് ഉപയോഗിക്കാമെന്ന് വ്യക്തമാക്കിയിട്ടുണ്ട്. ഇതിനെതിരെ ഉയർന്ന നിയമപരമായ വെല്ലുവിളിയും കോടതി തള്ളിയതോടെ നിലവിൽ ഈ പ്രൊഫഷണലുകൾക്ക് "Dr." പ്രിഫിക്സ് ഉപയോഗിക്കാം. എന്നാൽ BASLP ക്കാർക്ക് ഇങ്ങനെ ഉപയോഗിക്കാൻ കഴിയില്ല.
AI ക്ക് കാര്യമായി കടന്നു ചെല്ലാൻ പറ്റാത്ത മേഖലയാണ് എന്നതിനാൽ പുനരധിവാസ പ്രൊഫഷണലുകൾക്ക് ഇനിയും demand ഉണ്ടാകും.
2027 ൽ NCAHP യുടെ പരിപൂർണ നിയന്ത്രണം BOT നടത്തുന്ന സ്ഥാപനങ്ങൾക്ക് മേലെ വരും. അതോടെ ഇന്ന് കൂണ് പോലെ മുളച്ചു പൊന്തിയ പല സ്ഥാപനങ്ങൾക്കും അംഗീകാരം നഷ്ടപ്പെടുകയും സീറ്റുകളുടെ എണ്ണത്തിൽ പരിധി വരികയും ചെയ്യുമെന്ന് പ്രതീക്ഷിക്കുന്നു.
കൂടാതെ ഭാവിയിലും occupational തെറാപ്പിസ്റ്റുകൾക് വിദേശ രാജ്യങ്ങളിൽ ഡിമാൻഡ് ഉയർന്നു തന്നെ നിലനിൽക്കുമെന്ന് കരുതുന്നതിനാൽ BOT യും
ചെറുമീനല്ല എന്ന് മനസ്സിലാക്കുക
മറ്റൊരു കാര്യം കൂടി...:
കേരളത്തിൽ ഈ വർഷം 1.10 ലക്ഷം വിദ്യാർത്ഥികളാണ് NEET പരീക്ഷ എഴുതിയത്. എന്നാൽ സർക്കാർ മെഡിക്കൽ കോളേജുകളിലെ MBBS മെറിറ്റ് സീറ്റുകൾ 1,600-ൽ താഴെ മാത്രമാണ്. അതിനാൽ മികച്ച തയ്യാറെടുപ്പുള്ള ലക്ഷം വിദ്യാർത്ഥികൾക്ക് മെഡിസിൻ എന്ന സ്വപ്നം യാഥാർഥ്യമാകാതെ പോകുന്നു.
എന്നാൽ അവരിൽ കുറച്ചുപേർക്കെങ്കിലും അറിയാവുന്ന മറ്റൊരു വഴിയുണ്ട്. NEET-നുള്ള അതേ തയ്യാറെടുപ്പോടെ തന്നെ കേന്ദ്ര സർക്കാർ സ്ഥാപനങ്ങൾ നടത്തുന്ന പുനരധിവാസ-അനുബന്ധ ആരോഗ്യ കോഴ്സുകളുടെ പ്രവേശന പരീക്ഷകളും എഴുതാം. കുറഞ്ഞ ഫീസിൽ ദേശീയ നിലവാരമുള്ള സ്ഥാപനങ്ങളിൽ പഠിച്ച് മികച്ച പ്രൊഫഷണലാകാനും പിന്നീട് ഡോക്ടറെപ്പോലെ സ്വന്തമായി ക്ലിനിക്കോ പുനരധിവാസ കേന്ദ്രമോ ആരംഭിക്കാനുമുള്ള അവസരങ്ങളാണ് ഈ മേഖലകൾ നൽകുന്നത്.
ഇന്ന് AIISH നടത്തുന്ന BASLP പ്രവേശന പരീക്ഷയെക്കുറിച്ച് കേരളത്തിൽ കുറച്ചുപേർക്കെങ്കിലും അറിയാം. ഇപ്രാവശ്യത്തെ AIISH rank listil 75% പേർ മലയാളികൾ ആയിരുന്നു. NEET repeaters ആയിരുന്നു അവരിൽ ബഹു ഭൂരിപക്ഷം.
എന്നാൽ അതിലും കൂടുതൽ അവസരങ്ങൾ തുറന്നുകൊടുക്കുന്ന മറ്റൊരു പ്രവേശന സംവിധാനത്തെക്കുറിച്ച് ഇന്നും ഭൂരിഭാഗം വിദ്യാർഥികൾക്കും രക്ഷിതാക്കൾക്കും അറിയില്ല.
SVNIRTAR, NIEPMD, Ali Yavar Jung National Institute (AYJNISHD), NILD, PDUNIPPD, വിവിധ Composite Regional Centres (CRCs) തുടങ്ങിയ കേന്ദ്ര സർക്കാർ സ്ഥാപനങ്ങൾ നടത്തുന്ന വിവിധ പുനരധിവാസ കോഴ്സുകളിലേക്കുള്ള പ്രവേശന പരീക്ഷകളെക്കുറിച്ച് കേരളത്തിൽ ഇപ്പോഴും വളരെ കുറച്ചുപേർക്കെ ഇപ്പോഴും അറിയുള്ളൂ എന്നതാണ് യാഥാർഥ്യം.
ചുരുക്കത്തിൽ BOT ആണോ BASLP ആണോ എന്ന് തീരുമാനിക്കുമ്പോൾ ഇന്നത്തെ ശമ്പളം മാത്രം നോക്കരുത്. നിങ്ങൾ പഠനം പൂർത്തിയാക്കി പുറത്തിറങ്ങുന്ന സമയത്തെ തൊഴിൽ വിപണിയും മനസ്സിൽ കാണണം. അതോടൊപ്പം, രാജ്യത്തെ മികച്ച കേന്ദ്ര സർക്കാർ സ്ഥാപനങ്ങളിലേക്കുള്ള പ്രവേശന സാധ്യതകളെക്കുറിച്ചും മനസ്സിലാക്കണം. ഒരു നല്ല കരിയർ തീരുമാനമെന്നത് ഇന്നത്തേക്കു വേണ്ടിയല്ല, നാളേക്കു വേണ്ടിയാണ്.
Article By: Nizar Peruvad
CIGI Career Team